ÜST-nin Azərbaycana göndərilmiş missiyası koronavirusa (COVID-19) yoluxmuş şəxslərin vaxtında aşkar olunması və müalicəsini tövsiyə edir

BAKI, 13 mart 2020-ci il – Koronavirusa hazırlıq və cavab tədbirlərini dəstəkləmək üçün ölkəyə gələn Ümumdünya Səhiyyə Təşkilatının (ÜST) missiyası virusun yayılmasının qarşısını almaq və bütün pasientlərə qayğını optimallaşdırmaq üçün yoluxma hallarının erkən aşkarlanmasının prioritet olmasını tövsiyə edib. Çoxsaylı məsləhətləşmələrdən sonra yerli rəsmi qurumlara təqdim olunan tövsiyələr ən yaxşı təcrübələrə əsaslanır.

“ÜST koronavirusu pandemiya olaraq xarakterizə edib. Bu, bütün ölkələrə xalqlarını və dünyanı qorumaq üçün fəaliyyətə keçmək üçün çağırışdır və qlobal həmrəyliyə nail olmaq çox vacibdir. Çətinliklər və onların həll yolları üzərində bir həftə ərzində intensiv işlədikləri üçün Azərbaycanın yerli rəsmi qurumlarına minnətdarıq. Koronavirusa cavab tədbirlərini genişləndirmək üçün göstərdikləri səyləri yüksək qiymətləndiririk,” ÜST missiyasının rəhbəri Karolina Braun bildirib.

ÜST missiyasının fəaliyyəti

ÜST-nin ekspert qrupu aşağıdakı sahələri inkişaf etdirmək üçün səhiyyə orqanları ilə işləyib: nəzarət və laboratoriya müayinəsi; risk kommunikasiyası; infeksiyanın qarşısının alınması və nəzarət; xəstələrə qulluq; zəruri dərmanlara əlçatımlılıq, eləcə də ictimai yerlərdə lazımi məsafənin qorunması tədbirləri daxil olmaqla səhiyyə sisteminə təsirin azaldılması.

5 gün davam edən missiya zamanı ÜST mütəxəssisləri şəhər və rayonlarda yerləşən xəstəxana və laboratoriyalara baş çəkib, koronavirusa yoluxmuş insanları aşkar və müalicə etmək üçün milli planı müzakirə edib. Nümayəndə heyəti, həmçinin hakimiyyət orqanları ilə birlikdə koronavirusa cavab tədbirlərinə dair strategiyanı daha da inkişaf etdirmək üzərində çalışıb.

ÜST-nin Azərbaycana dəstəyi

ÜST ölkə və regional ofisləri vasitəsilə, həmçinin ölkədəki beynəlxalq ekspert və tərəfdaşları cəlb etməklə Azərbaycana dəstəyini davam etdirəcək. Azərbaycan ÜST-dən laboratoriya test dəstləri əldə edib. Bundan əlavə, koronavirusa yoluxmaqda şübhəli bilinən və virusa yoluxmuş şəxslərə qayğı göstərən tibb işçilərini və şübhəli halları sınaqdan keçirməyə kömək edən laboratoriya əməkdaşlarını qorumaq üçün fərdi qoruyucu vasitələr (PPE) alınacaq.

Azərbaycan hökuməti, qonşu ölkələrlə əlaqələndirilmiş şəkildə, koronavirusun qarşı mübarizədə qlobal səylərə öz töhfəsini verir və ÜST-nin strateji hazırlıq və cavab tədbirləri planına 5 milyon ABŞ dolları ayırmağı öhdəsinə götürüb. Bu plan, 2020-ci ilin aprel ayına qədər koronovirusa qarşı hazırlıq işləri və cavab tədbirlərini görmək üçün vacib ictimai səhiyyə tədbirlərini həyata keçirmək məqsədilə beynəlxalq səhiyyə təşkilatlarının, o cümlədən ÜST-nin ehtiyac duyduğu fəaliyyət və mənbələri əks etdirir. Bu həmçinin ölkənin hazırlığı və cavab əməliyyatları, habelə prioritet sayılacaq tədqiqat və innovasiya işlərini sürətləndirmək üçün beynəlxalq əlaqələndirmə və əməliyyat dəstəyini əhatə edir.

Tədbirlər
mart 2020
2425262728291
2345678
9101112131415
16171819202122
23242526272829
30
3112345
30 mart / Bazar ertəsi
Bizi izləyin: