FAO Azərbaycanda torpaqların konsolidasiyası istiqamətində çalışır

FAO expert Morten Hartvigsen shares land consalidation project results in the final workshop. Photo/ FAO Azerbaijan.

BAKI, 30 avqust 2019 –  BMT-nin Ərzaq və Kənd Təsərrüfatı Təşkilatı (FAO) Azərbaycanda torpaqların konsolidasiyası üzrə üçillik texniki yardım layihəsinin son seminarını təşkil edib. Tədbir Kənd Təsərrüfatı Nazirliyi, Əmlak Məsələləri üzrə Dövlət Komitəsi, Azərbaycanda Meliorasiya və Su Təsərrüfatı ASC, yerli hökumət nümayəndələri və fermerləri bir araya gətirib.

Tədbirdə mütəxəssislər layihə çərçivəsində görülən işlər barədə məlumat veriblər. Buraya konsolidasiyasının faydaları barədə məlumatlılığın artırılması məqsədilə icmaların inkişafına yönəlmiş seminarlar, eləcə də milli tərəfdaşlarla sıx əməkdaşlıq şəraitində yerli icmaların inkişafı planı daxildir. Planda kəndlərdə kənd təsərrüfatı infrastrukturunun yaxşılaşdırılmasının vacibliyi vurğulanır, o cümlədən həmin ərazilərdə müvafiq suvarma sxemi təklif edilir.

Layihənin ilkin mərhələsində Salyan rayonunun pilot kimi seçilmiş Şorsulu kəndində texniki-iqtisadi əsaslandırma keçirilib və burada 608 torpaq mülkiyyətçisinin 89 faizinin torpaqdan istifadəsi, torpaq mülkiyyətinin qeydiyyatı ilə bağlı problemlər və alqı-satqı, mübadilə və ya icarə yolu ilə torpaqların konsolidasiyasında iştirak etməklə bağlı sorğu aparılıb. Respondentlərin 88 faizi torpaq sahələrinin birləşdirilməsində maraqlı olduğunu bildirib. Tədqiqatın nəticələrinə əsasən, pilot kənd üçün torpaqların yenidən bölüşdürülmə planı tərtib edilib. Nəticədə, kənd təsərrüfatı təyinatlı torpaqların vahidləşdirilməsi haqqında qanun qəbul edildikdən sonra yeni torpaq sahələri plan üzrə qeydiyyata alına bilər.

“Azərbaycan fermer təsərrüfat strukturlarının yaxşılaşdırılmasına aparan bir yola qədəm qoyub,” FAO-nun kiçik sahibkarlara və ailə təsərrüfatlarına dəstək üzrə regional təşəbbüs meneceri, layihənin aparıcı texniki mütəxəssisi Morten Hartvigsen deyib. “Buna baxmayaraq, torpaq konsolidasiya fəaliyyətlərini genişləndirərək tam işlək milli proqram səviyyəsinə gətirib çıxarmaq üçün ölkənin əlavə beynəlxalq texniki yardıma ehtiyacı olacaq.”

FAO torpaqların parçalanması, qeyri-rəsmi və yenilənməmiş torpaq reyestri, eləcə də köhnəlmiş kənd təsərrüfatı infrastrukturu nəticəsində yaranan kənd struktur problemlərinin həll yollarını müəyyənləşdirmək məqsədilə torpaq konsolidasiyasının tətbiq olunmasında Azərbaycan Respublikası Kənd Təsərrüfatı Nazirliyi ilə sıx əməkdaşlıq edib.

Layihənin nəticəsi olaraq, milli torpaq konsolidasiyası strategiyası, fəaliyyət planı olan dövlət torpaq konsolidasiyası proqramı və kənd təsərrüfatı torpaqlarının birləşdirilməsi haqqında qanun hazırlanaraq müzakirə olunub və tətbiqi üçün hökumətə təqdim edilib.

 

Tədbirlər
sentyabr 2019
2627282930311
2345678
9101112131415
161718
19
202122
23242526272829
30123456
19 sentyabr / Cümə axşamı
Bizi izləyin: