Avropa İttifaqı və BMTİP koronavirus pandemiyası dövründə Azərbaycanda peşə təhsili pilləsi üzrə onlayn tədrisin təşkilində Peşə Təhsili üzrə Dövlət Agentliyinə dəstək olur

Bakı, 24 sentyabr 2020 – Avropa İttifaqı, Birləşmiş Millətlər Təşkilatının İnkişaf Proqramı və Peşə Təhsili üzrə Dövlət Agentliyinin birgə əməkdaşlığı ilə Azərbaycanda peşə təhsili müəssisələrinin tələbələri üçün onlayn dərslərin çəkilişləri davam etdirilir.

Cari tədris ili üçün ixtisas modulları üzrə dərslərlə yanaşı, baza modulları üzrə də elektron resurslar hazırlanmaqdadır. Qeyd edək ki, ötən tədris ilində birgə əməkdaşlıq çərçivəsində bir sıra peşə ixtisasları üzrə onlayn dərslər ərsəyə gətirilib. Ümumilikdə hazırlanan video dərslər koronavirus pandemiyası dövründə təhsilin distant formada davam etdirilməsi məqsədilə televiziyada yayımlanacaq.

Yeni tədris ilində tələbələrin distant tədrisinə dəstək məqsədi ilə sahibkarlıq, şəxsi inkişaf və karyera planlaşdırması, İKT kimi baza modulları, həmçinin kompüter operatoru, dərzi ixtisasları üzrə onlayn dərslər hazırlanıb. Adıçəkilən dərslər ARB Günəş televiziya kanalında “Dərs vaxtı” adı altında 25 sentyabr tarixindən etibarən yayımlanacaq, müxtəlif rəqəmsal platformalarda, o cümlədən Peşə Təhsili üzrə Dövlət Agentliyinin rəsmi YouTube kanalında paylaşılacaq.

Teledərslər tələbələrin nəzəri və praktiki biliklərinin artırılmasını hədəfləyərək hər kəsin, xüsusən də ölkədə internetə çıxışı olmayan şəxslərin təhsilinə dəstək olacaq. Bütün dərslər həmçinin, Azərbaycan Respublikası Təhsil Nazirliyinin VIDEO.EDU.AZ portalına yerləşdiriləcək.

Dərslər, Avropa İttifaqının maliyyələşdirdiyi, BMTİP və Peşə Təhsili üzrə Dövlət Agentliyinin birgə icra etdiyi Azərbaycanın peşə təhsili və təlimi sisteminin daha da gücləndirilməsi və müasirləşdirilməsi məqsədi ilə həyata keçirilən “Lənkəran İqtisadi Rayonunda Regional Model Peşə Təhsili Mərkəzinin Yaradılması” və “Gəncədə Sənaye üzrə Regional Peşə Kompetensiya Təhsili Mərkəzinin Yaradılmasına dəstək” layihələri çərçivəsində hazırlanır.

Əlaqə üçün məlumat:

Dilarə Umudova, BMTİP-nin Azərbaycan ofisinin İctimai əlaqələr üzrə baş mütəxəssisi – dilara.umudova@undp.org

Gülnarə Bayramova, Avropa İttifaqının Azərbaycan Nümayəndəliyinin Mətbuat və İnformasiya Rəhbəri gulnara.bayramova@eeas.europa.eu

Avropa İttifaqının maliyyə dəstəyi ilə BMTİP, Peşə Təhsili üzrə Dövlət Agentliyi və Təhsildə Keyfiyyət Təminatı Agentliyi Qeyri-formal və İnformal yollarla əldə edilmiş səriştələrin tanınması üzrə Təlim Proqramı təşkil edib

Bakı, 23 sentyabr 2020 – Avropa İttifaqı, Birləşmiş Millətlər Təşkilatının İnkişaf Proqramı, Peşə Təhsili üzrə Dövlət Agentliyi və Təhsildə Keyfiyyət Təminatı Agentliyi qeyri-formal və informal yollarla əldə edilmiş səriştələrin tanınması üzrə beynəlxalq ekspertin iştirakı ilə iki günlük təlim proqramı təşkil edib. Proqram peşə təhsili mütəxəssislərini, özəl sektor nümayəndələri və sahə üzrə peşəkarları bir araya gətirib.

Təlim, bilik və bacarıqlarının rəsmiləşdirilməsini istəyən vətəndaşlar üçün nəzəri və praktik qiymətləndirmə prosesinin təşkilinə dair addımları əhatə edib.

Bu qiymətləndirmələr aparıldıqdan sonra vətəndaşlar, iş tapmaq yaxud karyeralarını yeni mərhələyə daşımaq şanslarını artırmağa kömək edəcək sertifikatlar alacaqlar. Qeyri-formal və informal səriştələrin tanınması üzrə təşviq fəaliyyətlərinin Azərbaycan əmək bazarında bacarıqlı işçi qüvvəsi üçün yeni imkanlar açacağı gözlənilir.

İlk imtahan bu ay, Təhsildə Kefiyyət Təminatı Agentliyi və tikinti materialları istehsalı üzrə beynəlxalq “Knauf” şirkətinin dəstəyi ilə quru inşaat üzrə biliklərini rəsmiləşdirmək istəyən namizədlər üçün Gəncədə həyata keçiriləcəkdir. İmtahan zamanı Təhsildə Keyfiyyət Təminatı Agentliyi nümayəndəsinin sədrlik etdiyi xüsusi komissiya tərəfindən qiymətləndirilmə aparıldıqdan sonra yüksək nəticə göstərmiş namizədlər sertifikatla təltif olunacaqlar.

İmtahan öncəsi keçirilən bu təlim proqramı, Avropa İttifaqının maliyyələşdirdiyi, BMTİP və Peşə Təhsili üzrə Dövlət Agentliyinin birgə icra etdiyi Azərbaycanın peşə təhsili və təlimi sisteminin daha da gücləndirilməsi və müasirləşdirilməsi məqsədi ilə həyata keçirilən “Gəncədə Sənaye üzrə Regional Peşə Kompetensiya Təhsili Mərkəzinin Yaradılmasına dəstək” layihəsi çərçivəsində təşkil edilib.

Əlaqə üçün məlumat:

Dilarə Umudova, BMTİP-nin Azərbaycan ofisinin İctimai əlaqələr üzrə baş mütəxəssisi – dilara.umudova@undp.org

Gülnarə Bayramova, Avropa İttifaqının Azərbaycan Nümayəndəliyinin Mətbuat və İnformasiya Rəhbəri gulnara.bayramova@eeas.europa.eu

BMT75: Arzuladığımız Gələcək, Görmək İstədiyimiz BMT

Nyu York, 21 sentyabr 2020 – COVID-19 pandemiyası dövründə BMT apardığı qlobal sorğuda bərabərsizliklər və iqlim dəyişikliyi ilə əlaqədar tədbirlər görülməsi, habelə daha çox həmrəylik naminə qətiyyətli çağırışlar edilib.

2020-ci ilin yanvarında Birləşmiş Millətlər Təşkilatı öz 75 illiyini (UN75) qeyd etmək üçün qlobal məsləhətləşmələrə başlayıb. Beynəlxalq əməkdaşlıq və xüsusən də BMT-dən olan gözləntiləri başa düşmək üçün BMT-nin bu günə qədər apardığı ən geniş miqyaslı təşəbbüs çərçivəsində keçirilən sorğu və dialoqlar vasitəsilə ilə dünya əhalisinin gələcəyə olan ümid və qorxularına dair fikirlər toplanıb. Bu, eyni zamanda COVID-19 pandemiyasından sonra bərpa proseslərinə başlamaq üçün prioritetlərə dair ən böyük sorğu idi.

21 sentyabr 2020-ci il tarixinədək sorğuda bütün ölkələri və əhali təbəqələrini təmsil edən bir milyondan çox insan iştirak edib. Onların cavabları, dünya əhalisinin bu çətin dövrdə istəklərinə dair müfəssəl biliklər təmin edib. Nəticələr, bu gün BMT Baş Assambleyasının 75 illiyi münasibətilə “Arzuladığımız gələcək, görmək istədiyimiz BMT” şuarı altında keçirilən rəsmi mərasımlə eyni gündə təqdim olunub. Sorğunun əsas nəticələri aşağıdakılardır:

Fəaliyyət prioritetləri

  • Müxtəlif bölgələr, yaş və sosial qrupları təmsil edən respondentlər gələcək üçün prioritetlər mövzusunda vahid mövqe numayiş etdiriblər.
  • COVID-19 böhranı şəraitində əksər respondentlər üçün ən təcili prioritet səhiyyə, təmiz su, kanalizasiya və təhsil kimi əsas xidmətlərə çıxışın yaxşılaşdırılmasıdır. Bundan əlavə, əsas prioritet kimi beynəlxalq həmrəyliyin daha da genişləndirilməsipandemiyanın təsirindən ən çox əziyyət çəkənlərə dəstəyin artırılmasıdır. Buraya bərabərsizliklərlə mübarizə və daha inklüziv iqtisadiyyatın yenidən qurulması daxildir.
  • Gələcəyə baxdıqda, ciddi narahatlıq doğuran məsələ iqlim dəyişikliyi və təbii mühitin məhv edilməsidir. Digər prioritetlər sırasında həmçinin insan hüquqlarına daha çox hörmətin təmin edilməsi, münaqişələrin həlli, yoxsulluqla mübarizə və korrupsiyanın azaldılması qeyd olunub.

BMT haqqında təsəvvürlər

  • Respondentlərin 87%-dən çoxu bugünkü problemlərlə mübarizə aparmaq üçün qlobal əməkdaşlığın vacib olduğunu və pandemiyanın beynəlxalq əməkdaşlığı daha da aktuallaşdırdığını düşünür.
  • Hər 10 respondentdən altısı təşkilatın yaradılmasından keçən 75 illik dövr ərzində BMT-nin dünyanı daha yaxşı vəziyyətə gətirdiyinə inanır. Gələcəyə nəzər yetirdikdə, respondentlərin 74%-i problemlərin həllində BMT-nin rolunu “mühüm” hesab edir.
  • Bununla belə, respondentlər, BMT-nin dəyişməsini və yenilənməsini istəyirlər: 21-ci əsrə uyğun şəkildə müxtəlifliyi əhatə etmək üçün daha inklüziv, habelə daha şəffaf, məsuliyyətli və təsirli təşkilat görmək istəklərini ifadə etmişdirlər.

Bu yubiley ili ərzində qlobal müzakirələrə başladıq. Əldə etdiyimiz nəticələr heyrətedicidir. İnsanlar ortaya geniş düşüncə qoyur – eyni zamanda beynəlxalq əməkdaşlıq və qlobal həmrəylik üçün ciddi istək ifadə edirlər. Vəzifəmiz – bu istəklərə cavab vermək və hədəfləri reallaşdırmaqdır. 75 illik yubiley ilində dövrümüzün 1945-ci ilini yaşayırıq. Onunla üz-üzə gəlməyə hazır olmalıyıq. Qarşılaşdığımız fövqəladə vəziyyəti aşmaq, dünyanı yenidən hərəkətə gətirmək və sürətləndirmək və çiçəklənmək istiqamətinə yönəltmək, habelə Əsasnaməmizin baxışını dəstəkləməyimiz üçün əvvəlkindən daha möhkəm birlik nümayiş etdirməliyik,” Birləşmiş Millətlər Təşkilatının Baş katibi António Guterreş bildirib.

Hesabatın tam mətni və mətbuat üçün əlavə mənbələr: https://www.un.org/un75/presskit
Müzakirələr qatılın: www.un75.online

Tarixi arayış

  • 2020-ci ilin yanvarında BMT-nin baş katibi 75 illik yubileyi təntənəli mərasim kimi deyil, UN75 təşəbbüsü formatında qeyd etməyə dəvət edib. Əsas məqsəd mövcud qlobal çağırışlar və arzuladığımız gələcəklə üzləşdiyimiz tendensiyalar davam edəcəyi təqdirdə hara getdiyimiz arasındakı uçurum barədə dünyanın ən böyük müzakirə platformasının yaradılması idi.
  • Baş katib, UN75 təşəbbüsünü BMT-nin xidmət etdiyi insanları dinləməsi və inkişaf etmiş qlobal əməkdaşlıq üçün prioritetlərini və təkliflərini müəyyənləşdirməsi üçün fürsət kimi dəyərləndirirdi. UN75 təşəbbüsü, dünya əhalisinin gələcəyə olan ümid və qorxularını daha yaxşı başa düşmək, dünyanın hər güşəsindən olan insanları istədikləri gələcəyi təsəvvür etmək və bunun necə gerçəkləşdiriləcəyinə dair fikirlər irəli sürmək, o cümlədən hamı üçün daha yaxşı və dayanıqlı dünya qurmaq üçün arzuları səsləndirmək məqsədi daşıyan dəvət idi.
  • Rəsmi və qeyri-rəsmi sorğular və dünya üzrə aparılan dialoqlar vasitəsi ilə bu təşəbbüs qlobal narahatlıqları qiymətləndirmək və hansı növ qlobal əməkdaşlığın tələb olunduğuna dair dünyagörüşlərini toplamaq məqsədi daşıyırdı. Eyni zamanda, qlobal problemləri həll etməkdə Birləşmiş Millətlər Təşkilatının kömək edə biləcəyi rolu yenidən təsəvvür etmək üçün imkan yaratmışdır.
  • Pandemiya nəticəsində dünyanın bir çox yerində üzbəüz görüşlərə qadağaların qoyulması səbəbindən sözügedən təşəbbüs insanlarla onlayn təmasa çıxmaq, o cümlədən bir dəqiqəlik anket və sosial media vasitəsilə dialoqları mümkün qədər onlayn formata keçirmək üçün müvafiq səylərini artırmış və genişləndirib. Bundan əlavə, internet bağlantısı olmayan təbəqələrə çıxış əldə etmək üçün daha çox səy və resurs cəlb edərək yerlərdəki BMT ofisləri və digər tərəfdaşlarla əməkdaşlıq nəticəsində cavablar telefon və SMS üzərindən toplanıb.
  • Pandemiyadan sonra daha uğurlu bərpa proseslərini təşkil etməyə dair suallar əlavə etməklə BMT, COVID-dən sonra əhəmiyyətli olan prioritetlərlə əlaqədar bu günə qədər ən böyük və ən müfəssəl qlobal sorğu keçirməyə müvəffəq olub.
  • Nəticə etibarı ilə BMT-nin bütün Üzv və Müşahidəçi Dövlətlərini təmsil edən 1 milyondan çox insan bir dəqiqəlik sorğuda iştirak edib və dünyanın 82 ölkəsində 1000-dən çox dialoq formatında müzakirələr aparılıb. Bundan əlavə, 50 ölkədə 50,000 nəfər Edelman və Pyü (Edelman and Pew) Araşdırma Mərkəzinin müstəqil səsverməsinə qatılıb, 70 ölkədə sosial və ənənəvi medianın süni intellekt təhlili aparılmış, habelə bütün bölgələrdə elmi və siyasət araşdırmalar xəritələnməsi təşkil edilib.
  • Ümumiyyətlə, UN75 təşəbbüsü BMT tərəfindən qlobal səviyyədə real vəziyyətin öyrənilməsini həyata keçirmək, prioritetlərə və qlobal problemlərin həlli yollarına dair “insanların” öz fikir və təkliflərini eşitmək, habelə arzuladıqları gələcək və görmək istədikləri BMT-yə dair unikal təsəvvürlərini təqdim etmək üçün ən iddialı səyləri təmsil edir.

Əlavə məlumat və / və ya bir müsahibə üçün müraciət etmək məqsədilə Liza Laskaridis ilə əlaqə saxlayın (lisa.laskaridis@un.org)

Süni Mayalama mütəxəssisləri üçün təlimat kitabı

“Süni Mayalama mütəxəssisləri üçün təlimat kitabı” bu sahədə çalışan
mütəxəssislərin, zootexniklərin, həmçinin praktiki baytar həkimlərin biliklərinin genişlənilməsi, eləcə də baytarlıq təbabəti və zootexnik ixtisası üzrə təhsil alan tələbələrin təhsili üçün də faydalı vəsaitdir. Azərbaycan Respublikasında Mal-qaranın cins tərkibinin yaxşılaşdırılması yolu ilə məhsuldarlığının artırılması prioritet vəzifələrdən biri kimi qəbul edilməklə damazlıq-seleksiya işlərinin təkmilləşdirilməsi və süni mayalanma tədbirlərinin genişləndirilməsi əsas məqsədlərdəndir. Kitab aydın dildə yazılmış, süni mayalama sahəsində istifadə edilən metodlar şəkillər, sxemlər vasitəsi ilə izah edilmişdir.

Kitabça Kənd Təsərrüfatı Nazirliyi və FAO-nun birgə həyata keçirdiyi “Azərbaycanda iribuynuzlu damazlıq heyvanların cins tərkibinin yaxşılaşdırılması və səmərəli yemləmə sistemlərin yaradılması vasitəsilə iribuynuzlu heyvandarlığın inkişaf etdirilməsi” layihəsi çərçivəsində hazırlanıb.

Çətinliklərə baxmayaraq kənd təsərrüfatı işləri davam etməlidir.

Gənc azərbaycanlı fermer heyvandarlıq təsərrüfatı fəaliyyətini genişləndirərək ailəsi üçün daha yaxşı imkanlar yaratdı.

Çox az gənc kənd təsərrüfatı sahəsi ilə məşğul olmağı özünə peşə olaraq seçir. Hətta qeyd etmək lazımdır ki, Azərbaycanda fermerlərin 60 faizindən çoxu 55 yaşdan yuxarıdır. Buna baxmayaraq, dayanıqlı kənd təsərrüfatı fəaliyyəti  gənc və savadlı insanların marağına səbəb ola bilər.

Buna bariz nümunə kimi 32 yaşlı gənc fermer Rahib Ağayevi qeyd etmək olar. Gənc yaşlarının ilk illəri gələcək barədə qərar vermə zamanı yetişəndə onun bütün yoldaşları kənddən şəhərə köçməyə can atdırdı, onlar Rahibi də şəhərə onlarla birgə gəlməyə çağırırdılar. Lakin o, doğma yurdunda  qalmağı və arzusunu burada həyata keçirməyi üstün tutdu.

“Fərqli bir sahədə işləməyi təsəvvür edə bilmirəm” dedi.

O öz seçiminin fərqində idi. Rahibin ailəsi də hərzaman kənd təsərrüfatı ilə məşğul olumuşdu, atası mal-qara təsərrüfatı ilə məşğul olduğu zaman anası fermada işləyirdi. O, 10 yaşından bəri ailəsi ilə bu işin içində idi.

Asan olduğu görsənsə də, bu işə başlamaqda bir şeydi. O köhnə avadanlıqlarla kiçik bir əkinçilik fəaliyyətinə başladığı zaman 10-15 baş inək və qoyunu var idi. Rahib təsərrüfatını davam etdirmək və genişləndirmək məqsədilə maliyyə dəstəyi üçün FAO-Azərbaycan Tərəfdaşlıq Proqramı çərçivəsində həyata keçirilən Aqrar Məşğulluğun Artırılması Layihəsinə müraciət etdi.

Layihə gənc fermerlərin kənd təsərrüfatına marağını artırmaq üçün yaradılıb.

2019-cu ildə “Gənc Fermerlər Proqramında” uğurla iştirak edərək 30 min AZN (təxminən 17 650 ABŞ dolları) kredit əldə etməsi onun təsərrüfatını genişləndirərək daha çox xırdabuynuzlu heyvan almasına və gəlirlərini artırmağa kömək etdi.

Rahib, bu dəstəyə görə minnətdarlığını ifadə edərək, “Ailəmin dolanışığı və yaşayış şərtləri bütünlüklə yaxşılığa doğru dəyişdiyini” bildirdi.

O indi 380 qoyun, 6 inək və 20 keçinin sahibidir.

Qlobal COVID-19 pandemiyası Rahib Ağayevin fermasına təsir etsə də, o bilirdi ki, kənd təsərrüfatı müvəqqəti olaraq dayandıra biləcəyimiz bir şey deyil, dünyada nə olursa olsun onun işi davam etməlidir.

Ərzaq məhsullarımızın arxasında həmişə onu istehsal edən, yetişdirən  və ya mənzillərimizə çatdıran biri var. Builki Dünya Qida Günündə, fürsətdən istifadə edərək, mövcud vəziyyətdən asılı olmayaraq insanları qida məhsulları ilə təmin etməyə davam edən, dünyamızı inkişaf etməyə, qidalandırmağa və qorumağa kömək edən #QidaQəhrəmanları -mıza təşəkkür edirik.  #WorldFoodDay #FoodHeroes #ÜmumdünyaQidaGünü

Ətraflı məlumat: http://www.fao.org/fao-stories/article/en/c/1308002/

BMqT-nin Azərbaycan nüməyəndəliyi Ağdam rayonundakı kəhrizlərdə təmir işlərini davam etdirir

Bakı, 16 Sentyabr 2020 – Beynəlxalq Miqrasiya Təşkilatının Azərbaycan nümayəndəliyinin kankanları (kəhriz ustaları) Koreya Beynəlxalq Əməkdaşlıq Agentliyinin (KOICA) maliyyə dəstəyi ilə təşkilatın həyata keçirdiyi “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsi çərçivəsində Ağdam rayonunun Əhmədağalı kəndinin ərazisində yerləşən Heyvalı kəhrizində bərpa-təmir işlərinə başlayıblar. Bu yeni texnalogiyanın tətbiqi ilə Ağdam rayonu ərazisində bərpa olunan sayca üçüncü kəhrizdir. 26 quyudan ibarət olan Heyvalı kəhrizinin quyuları şaquli qazma qurğusundan istifadə edilməklə qazılacaq. Yeni texnologiya əl əməyi olmadan nisbətən qısa müddətdə böyük qazma dərinliyinə nail olmağa imkan verir. 

Bərpa ediləcək kəhrizin sularından kəndin ərazisində yerləşən Bənövşələr qəsəbəsində məskunlaşmış məcburi köçkün ailələri və kənd icması yararlanacaq.

Qeyd edək ki, adı çəkilən dörd illik layihə çərçivəsində məcburi köçkünlərin də sıx məskunlaşdığı Ağdam, Ağcabədi, Bərdə, Fuzuli, Gəncə, Qazax, Goranboy və Göygöl rayonlarının ərazisində 40-a yaxın kəhrizin bərpası vasitəsilə bu ərazidə yaşayan 8 mindən artıq ailəni təhlükəsiz və davamlı su ilə təmin etmək məqsədini daşıyır. Layihə kəhrizlərin bərpası ilə yanaşı, yerli icmaların dayanıqlığının artırılması, icmalarda məşğulluğun inkişafı və tədrisi də özündə cəmləşdirən komponentlərə malikdir.

Beynəlxalq Miqrasiya Təşkilatının Azərbaycan nümayəndəliyi region icmalarında maarifləndirmə təlimləri keçirir

Bakı, 10 Sentyabr –  BMqT-nin Azərbaycan nümayəndəliyinin əməkdaşları təşkilatın Koreya Beynəlxalq Əməkdaşlıq Agentliyinin (KOICA) maliyyə dəstəyi ilə həyata keçirdiyi “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsi çərçivəsində Ağdam rayonunda yerləşən Mirəşelli kəndinin icma üzvləri üçün maarifləndirmə təlimi keçirmişdir. Təlim icma təhlükəsizliyi, suyun effektiv istifadəsi, kəhrizlərə texniki qulluq və COVID-19 profilaktikası kimi mövzuları əhatə edirdi. 

Təlimlə yanaşı BMqT-nin əməkdaşları COVİD-19-la bağlı tövsiyə və qaydaları, gigiyena prosedurlarını əks etdirən broşurları və gigiyenik, mühafizə (üz maskaları və əl təmizləyici vasitələr) vasitələrini icma üzvləri arasında payladılar və kəndin strateji yerlərində COVİD-19-la bağlı məlumat plakatlarını yerləşdirdilər. 

BMqT ümumilikdə layihənin həyata keçirildiyi 8 rayonun 40 icmasından olan benefisiarlar arsında COVID-19-dan qorunmaq üzrə treninqlərin keçirilməsi, gigiyenik vasitələrin paylanmasını planlaşdırır.

Qeyd edək ki, adı çəkilən layihə məcburi köçkünlərin də sıx məskunlaşdığı Ağdam, Ağcabədi, Bərdə, Fuzuli, Gəncə, Qazax, Goranboy və Göygöl rayonlarının ərazisində 40-a yaxın kəhrizin bərpası vasitəsilə bu ərazidə yaşayan 8 mindən artıq ailəni təhlükəsiz və davamlı su ilə təmin etmək məqsədini daşıyır. Layihə kəhrizlərin bərpası ilə yanaşı, yerli icmaların dayanıqlığının artırılması, icmalarda məşğulluğun inkişafı və tədrisi də özündə cəmləşdirən komponentlərə malikdir.

Avqust ayında qlobal ərzaq qiymətləri artıb

Roma, 3 Sentyabr – Şəkər, bitki yağı və taxılın beynəlxalq qiymətləri iyul ayına nisbətən artıb, bununla da qlobal taxıl məhsullarının qiymətləri illik rekord göstəricisinə çatmaqda davam edir.

Birləşmiş Millətlər Təşkilatının Ərzaq və Kənd Təsərrüfatı Təşkilatının yayımladığı hesabata əsasən, qlobal ərzaq qiymətləri, ümumiyyətlə daha güclü tələbin və ABŞ dollarının zəifləməsi səbəbindən ardıcıl üçüncü ay olaraq Avqust ayında da artmaqda davam edib.

Ən çox satılan ərzaq məhsullarının beynəlxalq qiymətlərinin dinamikasının izləndiyi FAO-nun ərzaq qiymətləri indeksinə görə avqust ayında orta hesabla 96,1 bal təşkil edib, bu da ötən aya nisbətən 2,0 faiz çoxdur.

FAO Taxıl qiymət indeksi, iyul ayından etibarən 1,9 faiz artaraq 2019-cu il Avqust ayındakı dəyərindən orta hesabla 7,0 faiz artım göstərib və burada dənli bitkilər və taxıl məhsulları ilk sırada yer alıb. Darı məhsulunun qiymətləri Çinin böyük idxal tələbi səbəbindən 8.6 faiz artıb və keçən ilə nisbətən burada 33.4 faiz artım müşahidə olunur. Qarğıdalı qiymətləri, Ayova (Iowa) ştatındakı son məhsul azlığının tədarükə təsir edəcəyinə dair narahatçılıqlar bu məhsulun 2,2 faiz artmasına səbəb olub. Düyünün beynəlxalq qiymətlərində də mövsümdən asılı olan səbəblər və Afrikadan bu məhsula olan tələbin artması ilə yüksəlmə müşahidə edilib.

FAO şəkər qiymətləri indeksi əvvəlki aya nisbətən 6,7 faiz artaraq, dünyanın ikinci ən böyük şəkər ixracatçısı olan Avropa Birliyi və Taylanddakı əlverişsiz hava şəraitləri və Çinin güclü idxal tələbi nəticəsində istehsalın azalmasına səbəb oldu. FAO bitki yağı qiymət indeksi başda palma yağı olmaqla soya, günəbaxan və kolza yağları daha çox tələbata əsasən 5.9 faiz artıb.

FAO süd qiymətləri indeksi, İyul ayından etibarən dəyişməz olaraq qalıb, Okeaniyada geniş mövsümi ixrac imkanları gözləntiləri fonunda pendir və süd tozu qiymətləri aşağı enib, avqust ayında isti havanın təsiri nəticəsində südün azalması və Avropadan ixracatın azalması səbəbindən yağ qiymətləri yüksəlib.

FAO ət qiymətləri indeksi də iyul ayından etibarən demək olar ki dəyişməyib, 2019-cu ilin avqust ayına nisbətən 8,9 faiz azalsa da mal-qara və quş ətinə olan aşağı idxal tələbinin təsiri Çindən donuz ətinə olan tələbinin artması ilə kompensasiya olunub.

Taxıl məhsulları istehsalına dair proqnozlar

FAO, Amerika Birləşmiş Ştatlarında daha az qarğıdalı istehsalının olacağı gözləntilərinə əsasən 2020-ci ildə dünya taxıl istehsalına dair proqnozunu iyul proyeksiyasından etibarən 25 milyon ton azaldıb. Bununla birlikdə, bu azalmaya baxmayaraq belə bir nəticə 2019-cu ildə istehsal olunan məhsuldan 58 milyon ton çox təşkil edərək tarixin ən yüksək göstəricisi kimi müşahidə olunacaq.

Argentina və Braziliyada rekord dərəcədə qarğıdalı məhsulu istehsalı proqnozlaşdırılır. Həmçinin qlobal darı istehsalının əvvəlki ilə nisbətən 6 faiz artması gözlənilir. 2020-ci ildə dünya miqyasında düyü istehsalının da 509 milyon tonluq yeni bir rekorda çatması gözlənilir.
Daha ətraflı məlumat, Taxıl Təchizatı və Tələbatı qısa məlumatında mövcuddur.

FAO-nun 2020/21 dünya taxıl istifadəsi üçün yeni proqnozuna əsasən illik 2,0 faiz artımla 2 764 milyon ton səviyyəsindədir.

Qlobal taxıl ehtiyatlarının 2021 mövsümündə 1,7 faiz nisbətində artaraq 895,5 milyon tona çatması və dünya taxıl ehtiyatlarının 31,8 faiz nisbətində, iyul ayından bir qədər aşağı düşməsi, lakin əvvəlki illərə nisbətən yüksək olması gözlənilir.

Gözlənilən budur ki, daha böyük həcmdə düyü və taxıl məhsulları tədarükü ilə canlanan 2020/21-ci illərdə dünya taxıl ticarəti, 2019/20 illərindəki səviyyəsindən 1,6 faiz daha çox, 441,4 milyon ton səviyyəsində olacaq.

Əlaqəli keçidlər

FAO Food Price Index
FAO’s new Cereal Supply and Demand Brief
World Food Situation
AMIS: Market Monitor
Agricultural Market Information System

Uşaq hüquqları Komitəsinin hazırladığı Ümumi Şərhlərin Seçmə Toplusu

Bu vəsait Uşaq hüquqları Komitəsinin hazırladığı  Ümumi Şərhlərin  Seçmə Toplusunu təqdim edir.  Bu topluda Ümumi Şərh №5, 9, 10, 13 və 15 öz əksini tapmışdır.  

Vəsait Avropa İttifaqı və Birləşmiş Millətlər Təşkilatının İnsan Hüquqları üzrə Ali Komissarlığının maliyyə dəstəyi hesabına həyata  keçirilən “İnsan hüquqlarının təşviqi və müdafiəsi sahəsində milli tərəfdaşların potensialının artırılması”  layihəsi çərçivəsində tərcümə edilərək dərc olunmuşdur.

Beynəlxalq Miqrasiya Təşkilatının Azərbaycan nümayəndəliyi layihəsinin icra edildiyi ərazilərə monitorinq səfərləri təşkil edir

Bakı, 9 Sentyabr 2020 – Beynəlalq Miqrasiya Təşkilatının Azərbaycandakı nümayəndəliyinin ABŞ-ın Beynəlxalq İnkişaf Agentliyinin (USAID) maliyyə dəstəyi ilə həyata keçirdiyi ‘Həssas icmaların dayanıqlılığının gücləndirilməsi’ layihəsi çərçivəsində Quba, Qusar, Xaçmaz, Lənkəran və Zaqatala rayonlarına növbəti monitorinq səfərləri təşkil olunmuşdur. Səfər çərçivəsində dəstək göstərilmiş mikro sahibkarlıq fəaliyyərlərinə baxış keçirilmiş, benefisiarlara əlavə fərdi qoruyucu və təhlükəsizlik vasitələri təqdim edilmiş və eyni zamanda onlara əmək təhlükəsizliyinə dair ilkin təlimatlar verilmişdir. Continue reading “Beynəlxalq Miqrasiya Təşkilatının Azərbaycan nümayəndəliyi layihəsinin icra edildiyi ərazilərə monitorinq səfərləri təşkil edir”

Tədbirlər
sentyabr 2020
31123456
78910111213
14151617181920
21222324
25
2627
2829301234
25 sentyabr / Cümə
Bizi izləyin: