BMT QAK Yaponiyanın Fuji vision yardım missiyalarının 15 illiyinə həsr olunan tədbir keçirib

“Fuji” mission in Azerbaijan, July 2018.

BAKI, 6 may 2019– Yaponiyanın “Fuji Optical” şirkətinin Azərbaycana humanitar yardım missiyalarının 15 illiyinin qeyd olunması məqsədi ilə bu gün Bakıda yüksək vəzifəli dövlət məmurlarının, millət vəkillərinin, həmçinin BMT-nin və digər beynəlxalq təşkilatların, vətəndaş cəmiyyəti və mətbuat nümayəndələrinin iştirakı ilə tədbir keçirilib.

Baş nazirin müavini Əli Həsənov, BMT-nin rezident əlaqələndiricisi Qulam İshaqzai, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev, Yaponiyanın Azərbaycandakı səfiri Teruyuki Katori və “Fuji Optical” şirkətinin rəhbəri Doktor Akio Kanai BMT QAK-ın təşkil etdiyi tədbirdə çıxış etiblər.

Yaponiyanın özəl şirkəti “Fuji Optical” 2005-ci ildən etibarən Azərbaycana humanitar missiyalar həyata keçirir. Bu missiyalar zamanı, Yaponiyalı optometrist mütəxəssislər məcburi köçkünlər, qaçqınlar və digər aztəminatlı insanlar üçün göz müayinəsi aparır və onlara pulsuz eynəklər verirlər. Bütün missiyalara 2006-cı il “Nansen Qaçqın” mükafatı və bir çox başqa mükafatlarla təltif olunmuş Doktor Akio Kanai rəhbərlik edir.

“Fuji Optical” şirkəti Azərbaycana etdiyi humanitar missiyaların reallaşdırılması üçün 2005-ci ildən indiyədək 2,8 milyon ABŞ dollarından çox vəsait xərcləyib. Təqribən 59 min yüksək keyfiyyətli eynək və başqa əşyalar BMT QAK-ın Azərbaycandakı fəaliyyətinə natura şəklində dəstək olaraq ölkəyə gətirilib. Ümumilikdə, 31 min nəfərdən çox şəxs missiyalar zamanı göstərilən ödənişsiz göz müayinəsi xidmətlərindən faydalanıb.

Bu il, “Fuji Optical” şirkəti BMT QAK-a 3300 ədəd eynək, həmçinin görmə və eşitmə ilə əlaqəli digər əşyalar ianə edib və 7-13 may 2019-cu il tarixlərdə Yevlax, Goranboy və Bakı şəhərlərində keçiriləcək altı günlük eynək paylanışı dövründə 2400 məcburi köçkün, qaçqın və sığınacaq axtaran şəxsi müayinə etməyi planlaşdırır. Qeyd olunan xidmətlərin təşkili məqsədi ilə yerlərdə lazımi şəraitin yaradılması üçün BMT QAK-ın Azərbaycandakı nümayəndəliyi, əvvəlki illərdə olduğu kimi, aidiyyəti mərkəzi və yerli icra hakimiyyəti orqanları ilə birgə tədbirlər görür.

Fuji Optical” şirkəti BMT QAK-ın vacib özəl donorlarından biridir. 1983-cü ildən etibarən BMT QAK-ın himayəsində olan şəxslərə optometrik xidmətlərin göstərilməsi və eynək paylanışı ilə edilən natura şəklində davamlı yardımlardan əlavə, şirkət həm də BMT QAK-ın qlobal əməliyyatlarına nağd pul şəklində qeyd-şərtsiz ianələrlə dəstək verir. Şirkət BMT QAK-a 3 milyon ABŞ dolları ianə etməyi öhdəsinə götürüb və 2013-cü ildən ayırmaların köçürülməsinə başlayıb.

Doktor Akio Kanaiyə 2006-cı ildə “Nansen Qaçqın Mükafatı” kimi verilmiş vəsaiti də BMT QAK-a bağışlayıb. Bu vəsait Beyləqan rayonunda müvəqqəti məskunlaşmış Xocavənd rayonundan olan məcburi köçkün icmasının su təchizatının yaxşılaşdırılması layihəsinin maliyyələşdirilməsinə xərclənib. Həmçinin, Yaponiyanın “Yomiuri” qəzet nəşrinin Doktor Akio Kanaiyə verdiyi nüfuzlu “Yomiuri – Şinbon Beynəlxalq Əməkdaşlıq” adlı mükafatdan əldə olunan 5 milyon Yapon yeni (təqribən 44 min ABŞ dolları) məbləğində vəsait 2018-ci ildə Azərbaycana – Məcburi Köçkünlərin Sosial İnkişaf Fonduna bağışlanıb. Həmin vəsait Cəbrayıl rayonunun Cocuq Mərcanlı kəndinə qayıtmış məcburi köçkünlərin istifadəsi üçün kənd təsərrüfatı texnikasının alınmasına xərclənib.

Yaponiyanın “Fuji Optical” şirkətinin görmə qabiliyyətinin yaxşılaşdırılmasına yardım missiyaları çərçivəsində Azərbaycana etdiyi humanitar yardımları BMT QAK və Azərbaycan hökuməti, eləcə də benefisiarlar daim yüksək qiymətləndirir. Bu təşəbbüslər Azərbaycanın üzləşdiyi didərginlik probleminə və BMT QAK-ın işinə anlayış və rəğbət nümayiş etdirir.

BMT QAK milli hökumət qurumları ilə əməkdaşlıq şəraitində dünyada olan qaçqınların himayəsi və onlar üçün həll yollarının tapılması məqsədi ilə beynəlxalq müdaxilələrin idarə olunması və əlaqələndirilməsi vəzifəsini daşıyır.

 

Tədbirlər
may 2019
293012345
6789101112
13141516171819
2021222324
25
26
272829303112
25 may / Şənbə
Bizi izləyin: