Azərbaycanın aparıcı biznesləri BMT-nin Qlobal Sazişinin prinsiplərini və DİM-ləri fəaliyyət və strategiyalarına salınmasını müzakirə ediblər

BAKI, 26 noyabr 2019 – BMT-nin təşkil etdiyi konfransda dayanıqlı İnkişaf üçün 2030 Gündəliyinin icrasında biznesin rolu əsas müzakirə mövzusu olub. Tədbirdə dövlət orqanları, bizneslər, beynəlxalq təşkilatlar, vətəndaş cəmiyyəti və kütləvi informasiya vasitələrinin 80-ə yaxın nümayəndəsi iştirak edib.

BMT-nin rezident əlaqələndiricisinin ofisi, UNİCEF, BMT-nin Qlobal Sazişi, BMT Qadınlar və BMT-nin İnkişaf Proqramının birgə təşkil etdiyi konfransda BMT-nin Qlobal Sazişinin 10 prinsipinin biznes siyasətləri və təcrübələrinə inteqrasiyasının əhəmiyyəti vurğulanıb.

Tədbir zamanı, UNİCEF, BMT-nin Qlobal Sazişi və “Save the Children” təşkilatlarının hazırladığı və uşaq hüquqlarının qorunması üçün müasir korporativ sayğını təşviq edən Uşaq Hüquqları və Biznes Prinsipləri də müzakirə olunub.

“Hər kəs qəbul edir ki, Dayanıqlı İnkişaf üçün 2030 Gündəliyi ilə əlaqədar yüksək nəticələrin əldə olunması bütün maliyyə mənbələrinin istifadə olunmasından asılıdır,” BMT-nin rezident əlaqələndiricisi əvəzi Edvard Karvardin bildirib.

Cənab Karvardin əlavə edib ki, “getdikcə çətinləşən maliyyə şəraitində, daxili və beynəlxalq mənbələrdən daxil olan fərqli ictimai və özəl sektor maliyyələşməsi dayanıqlı inkişafa nail olmaq işində vacib rol oynayır.”

Konfrans çərçivəsində baş tutan seminarlar zamanı iştirakçılar dayanıqlı biznes təcrübələrinin uğurlu nümunələrini və Dayanıqlı İnkişaf Məqsədlərinin (DİM) şirkətlərin maliyyə, əməliyyat və qərarların qəbulu proseslərinə inteqrasiyası yollarını müzakirə ediblər. Çıxış edənlər həmçinin korporativ mühitdə gender bərabərliyi və qadınların səlahiyyətləndirilməsini təşviq edən prinsiplərin dəstəklənməsində bizneslərin rolu haqqında danışıblar.

BMT-nin baş katibinin təşəbbüsü ilə 2000-ci ildə əsası qoyulmuş BMT-nin Qlobal Sazişi daha dayanıqlı və məsuliyyətli bizneslərin yaradılması üçün çərçivəni təklif edir. 160-dan çox ölkədən 10,000 şirkət və 3,000 qeyri-biznes qurumu, eləcə də 60-dan çox yerli şəbəkəni bır araya gətirən BMT-nin Qlobal Sazişi bu gün dünyanın ən böyük korporativ dayanıqlılıq təşəbbüsüdür.

BMT-nin Qlobal Sazişinin 10 prinsipi İnsan Hüquqları haqqında Ümumi Bəyannamə, İşdə əsas prinsiplər və hüquqlar üzrə Beynəlxalq Əmək Təşkilatının Bəyannaməsi, Ətraf Mühit və İnkişaf haqqında Rio Bəyannaməsi və BMT-nin Korrupsiya əleyhinə Konvensiyası əsasında hazırlanıb.

Tədbirlər
iyul 2020
293012345
6789101112
13
14
1516171819
20212223242526
272829303112
14 iyul / Çərşənbə axşamı
Bizi izləyin: